ရှည်ကြောထပြီး နံပါတ်တက်လိုက်တော့ ဒီအကြောင်းကို ဆက်ရေးရမလိုဖြစ်နေတာနဲ့ မထူးဘူးလေဆိုပြီး အခုတော့ ကိုတင်ညွန့် (Continue) လုပ်ရဦးမယ်ဗျ။ ပြောရင်းနဲ့ ခေါင်းထဲ ကိုတင်ညွန့်အကြောင်းကပေါက်ချလာတယ်။ ကျွန်တော် ရန်ကုန်က ကွန်ပျူတာစင်တာ တစ်ခုမှာ အလုပ်လုပ်တုန်းက အဖြစ်အပျက်ပါ။
ကျွန်တော်
“ကလင် ကလင် ကလင်……
ဟုတ်ကဲ့ အေဘီစီ ကွန်ပျူတာစင်တာကပါ။
မေးသူ
အေဘီစီ ကွန်ပျူတာ စင်တာကပါလား။
ကျွန်တော်
ဟုတ်ပါတယ်။ ဘာအကူအညီပေးရမလဲခင်ဗျ။
မေးသူ
ကျွန်မကွန်ပျူတာမှာ လက်ကွက်ကျင့်တဲ့ ဆော့်ဝဲလ် ထည့်တာ လုပ်လို့မရလို့ရှင့်။
ကျွန်တော်
စကားပြောသံက ၀ဲတဲတဲနဲ့ ရှမ်းလိုလို ကရင်လိုလို ဘာမှန်းမသိ။ အင်္ဂလိပ်လို မြန်မာလို ဟိုညှပ်ဒီညှပ်ပြော။ နားထောင်ရတာ မြန်မာလိုပြောနေတာလို့ ထင်ရခက်တဲ့ ပြဿနာအိုးနဲ့ စောစောစီးစီးစတွေ့တော့တာပါဘဲ။
အဲဒါနဲ့ ကျွန်တော်လည်း -
ဘာ အမှားတွေ တွေ့ရလို့လဲ။ တစ်ချက်လောက်ပြောပြပါခင်ဗျာ။
မေးသူ
ဟုတ်ကဲ့။ ကိုတင်ညွန့် နှိပ်ပြီး ဆက်သွားလို့ မရလို့ပါ။
ကျွန်တော်
ဘာဖြစ်လို့ ကိုတင်ညွန့်ကို နှိပ်ခိုင်းရတာလဲ။
မေးသူ
မဟုတ်ဘူးရှင့် - ကိုတင်ညွန့်ကိုဘဲနှိပ်တာပါ။ ပြီးတော့ဘာမှ မပေါ်လာတော့ဘူး။
ကျွန်တော်
ကျွန်တော်လည်းစိတ်ပေါက်ပေါက်နဲ့
ခင်ဗျား ကိုတင်ညွန့်က ဘယ်လောက်တတ်လို့လဲ။
ဒီတော့မှ မအ၀ှာက ပေါက်သွားပြီး အင်္ဂလိပ်စာလုံးကို တစ်လုံးချင်းရွတ်ပြမှဘဲ ကျွန်တော့မှာ ငိုရမလို ရယ်ရမလိုနဲ့ အရှက်ပြေ --
အဲလိုဆိုရင် အစ်မစက်ကို ရုံးကို ယူလာခဲ့ပေါ့။ ဒီမှာ ထည့်ပေးမယ်ဆိုပြီိး ပြောလိုက်ရတယ်ဗျာ……….”
အခုတော့ မအ၀ှာပြောသလို့ ကျွန်တော့်အကြောင်းကို ဆက်ရအုံးမယ်။ လေကြောကတော့ ရှည်သွားပြီ။ ကိုယ့်ကိုယ်ကိုတောင် စိတ်မရှည်တော့ဘူး။ မြန်မာစာရိုက်ရတာက ၁နာရီ ၁မိုင်နှုန်းနဲ လိပ်ရိုက် ရိုက်နေရတာဆိုတော့။
ကျွန်တော်ဒီလိုနဲ့ ဖုတ်လိုက် ဖုတ်လိုက် ၁၀တန်းအောင်ပြီးတော့ မဟာသံဝေဂတွေက ဟိုကဒီက ထွက်လာတယ်။ သြော် …. လူ့လောက .. လူ့လောက … ဘယ်လောက်ပဲ ကြိုးစား ကြိုးစား တစ်ချိန် ကျတော့လည်း အားလုံးကို စွန့်ခွာပြီး ထားခဲ့ရမှာပါလား ဆိုပြီး သာသနာဘောင်ကို ၀င်ချင်လာတယ်။ ဒါနဲ့ ကျွန်တော်လည်း အိမ်ကိုပြောပြတော့ မိသားစုကတော့ ဘယ်ဝင်စေချင်မလဲ။ ငယ်တဲ့အရွယ်ဆိုတော့ စိတ်ကူးပေါက်ရာ လုပ်တယ်လို့ဘဲ ပြောကြတယ်။ နောက်ပြီး ကျွန်တော်က အကြီးဆုံးဆိုတော့ ကျန်တဲ့ ညီငယ်ညီမငယ်တွေကိုလည်း ကြည့်ဖို့တော့ စိတ်ထဲ နားလည်းပြီးသားပါ။ မေမေကတော့ တုံတိဘာဝေ - ဘာမှမပြောဘူး၊ ဒါပေမဲ့လည်း သူ့ရင်ထဲတော့ ဘယ်ခွဲသွားစေချင်မှာလဲလို့တော့ တွေးမိပါတယ်။
ဒါပေမဲ့ ကျွန်တော့်အကျင့်က လုပ်ချင်ပြီဆို လုပ်လိုက်ရမှ ကျေနပ်တာ။ ဒါနဲ့ ကျွန်တော့် ဘယ်သူ့ကိုမှ အသိမပေးဘဲ ရန်ကုန်မြိုကနေပြီး ရထားနဲ့ မန္တလေးကို တစ်ယောက်တည်း ထွက်ခဲ့တယ်။ စုထားတဲ့ ပိုက်စံ ၇၀၀ ကျော် (၁၉၉၇ အချိန်) လောက်နဲ့ အင်္ကျီ ပုဆိုး သုံးလေးထည်၊ ပြီးတော့ ဖတ်ချင်တဲ့စာအုပ်တွေကို စုထုပ်ပြီး ရိုးရိုးတန်းက စီးလာခဲ့တယ်။ ကိုယ်ကဘဲ ကံမကောင်းတာလားမသိ လက်မှတ်စစ်ကလည်း ၃ခေါက်စစ်တိုင်း ကျွန်တော့်အထုတ်ကိုဘဲ ၃ကြိမ်ထုတ်ကြည့်တယ်။ တော်သေးတာပေါ့ မှောင်ခိုတစ်ခုမှ မသယ်လာပေလို့ဘဲလို စိတ်ထဲတော့တွေးမိတယ်။
ငယ်ငယ်ကတည်းက မိဘတွေနဲ့ တစ်ခါမှ မခွဲဘူးသလို အခုလိုမျိုးတစ်ခါမှ ခရီးရှည်မသွားဘူးတော့ စိတ်ထဲတော့ နဲနဲအားငယ်မိတယ်။ ပြီးတော့ အခုသွားမည့် စစ်ကိုင်းကိုလည်း တစ်ခါမှ မသွားဘူးဘူးဗျ။ အဲဒါနဲ့ ခရီးဖော် အစ်ကိုတစ်ယောက်ကို မန္တလေးရောက်ရင် စစ်ကိုင်းကိုဘယ်လိုသွားရမလဲဆိုတာကို သေချာမေးပြီး ခရီးဆက်ခဲ့တယ်။
မနက် ၇ နာရီလောက်ရောက်တော့ ရထားက မန္တလေးဘူတာကို ချဉ်းကပ်လာပြီ။ ဒါနဲ့ကျွန်တော်လည်း အထုတ်တွေကို စင်ပေါ်ကချပြီး ဆင်းဖို့တကဲကဲ လုပ်နေတယ်။ ရထားဆိုက်တော့ အထုပ်ဆွဲပြီး အထွက် ဘူတာမှာ ခရီိးသည်တင် ဆိုက်ကားဆရာတွေက အတင်း အထုပ်ကှိုဆွဲပေးမယ်ဆိုပြီးယူတော့ ကျွန်တော်လည်း ဘုမသိ ဘမသိနဲ့ သူနောက်က လိုက်သွားလိုက်တယ်။ ဆိုက်ကားနားရောက်တော့မှ ဘယ်သွားမှာလဲမေးတော့ ကျွန်တော်လည်း စစ်ကိုင်းကားဂိတ်ကို သွားမယ်လို့ပြောလိုက်တယ်။ ကိုယ်တော်ချောက ၅၀ ကျပ် တောင် တောင်းတော့ ပေးခဲ့ရသေးတယ်။ စစ်ကိုင်းကားဂိတ်ရောက်တော့ ကားကလည်းထွက်ဖို့ အဆင်သင်ဖြစ်နေတာနဲ့ ကွက်တိဖြစ်သွားတယ်။
ဆက်ရန်။
Subscribe to:
Post Comments (Atom)
No comments:
Post a Comment