မွေးနေ့ဆုမွန်

ဒီကနေ့ ညနေ ၅ နာရီ ခွဲလောက်က ကျွန်တော့်ဖုန်းထဲ အက်စ်အမ်အက်စ် (sms) စာတစ်စောင်ရောက်လာတော့ ဖတ်ကြည့်လိုက်တယ်။

“ဟေး ဒီနေ့ဟာ ငါ့မွေးနေ့ဖြစ်လို့
အပြင်ကဘာမှ စားမလာကြနဲ့။
စားစရာတွေ ငါဝယ်လာခဲ့မယ် …. ကိုဟ၀ှာ”

အတူနေတဲ့ သူငယ်ချင်းတစ်ယောက်က သူ့မွေးနေ့မှာ ကျွေးမယ်ဆိုတဲ့ စာဖြစ်နေတယ်။ စိတ်ထဲတော့ တွေးမိတယ်။ သူ့ဟာက ဘာတွေဝယ်လာမှာမို့လို့အပြင်ကမစားဖို့ ပြောပြီး ဗိုက်မ၀တာဆိုရင်တော့ ဒုက္ခဘဲ။ မနက်ကတည်းက ကြိုလည်းမပြောဘူး၊ ဒီလိုမှန်းသိ မနက်စာနဲ့ နေခင်းစာကို လျော့ပြီး စားထားမှာပေါ့။ မတက်နိုင်ဘူး၊ စောင့်ကြည့် ရသေးတာပေါ့ဆိုပြီး သိပ်မယုံချင် ယုံချင်နဲ့ဘဲ “အင်း” ဆိုပြီး ပြန်ပြောလိုက်တယ်။

ညနေရုံးဆင်းတော့မှ သူက ၀ယ်စရာတွေကို ဈေးမှာ သွားဝယ်မယ်ဆိုလို့ အဖော်လိုက်သွား ရသေးတယ်။ ဟိုရောက်တော့ ကိုစားချင်တာတွေကို အတင်း လိုက်ဝယ်တယ်။ အင်း ဆိုးတော့ မဆိုးပါဘူးလေ…….၀ယ်ထားတဲ့အထဲမှာ
ပုစွန် ၊ ကြက်ကောင်လုံးကင်၊ ၀က်ခေါက်ကင်၊ ဘဲကင်၊ မြေပဲကြော်၊ အစိမ်းကြော် အပြင် နဲနဲပါးပါး ဘီယာလေးဘာလေး ကို မရမက ပါအောင် ၀ယ်ခဲ့တယ်။ အပြန်ကြတော့ တော်တော်လေးကို ဗိုက်စာနေတာနဲ့ အငှားကားစီးပြီး သုတ်ခြေတင် ပြန်ခဲ့ကြတယ်။

အိမ်ရောက်တော့မှ ကျန်သူငယ်ချင်းတွေလည်း ပြန်လာကြပြီဆိုတော့ သူ့ရဲ့ မွေးနေ့ညစာ စားဖို့ အင်တိုက် အားတိုက်ပြင်ဆင်ကြတယ်။ ပင်ပန်းလိုက်တာ သူ့မွေးနေ့က အေးအေး ဆေးဆေးမစားရဘူး။ ဟိုဟာလုပ် ဒီဟာလုပ်နဲ့ ည ကို ၈နာရီဒေါင်ဒေါင်မြည်သွားတယ်။ မထူးပါဘူး ရေလည်းနောက်မှ ချိုးမယ်ဆိုပြီး ဟိုဟာဒီဟာတွေ ပေါင်းစပ်ရောထားတဲ့ တန်ဖိုးကြီိး မွေးနေ့ညစာကို စတင်ကြတယ်။

ကျွန်တော်တို့လည်း မကောင်းတတ်တာနဲ့ အစဉ်အလာအရ ဖယောင်းတိုင်မီးတွေ ဘာတွေ မထွန်းတော့ဘဲ “Happy Birthday” လို့ပြောပြီး ခေါင်းမဖော်တန်း စားသောက်လိုက်ကြတာ၊ ဘာပြောကောင်းမလဲ ၀ယ်လာသမျှ အကုန်တက်တင်စင်တော့တာဘဲ။

စားရင်းသောက်ရင်း စိတ်ထဲတော့ ဟိုရောက်ဒီရောက် တွေးရင်းနဲ့ သူများကြွေးတဲ့ဟာတွေ စားထားပြီဆိုတော့ အာပတ်ပြေအောင် ဟဲဟဲ ဆုတောင်းပေးလိုက်ပါတယ်။

“အသက်တွေက တဖြည်းဖြည်းကြီးလာပြီဆိုတော့
ပိုမို ရင့်ကျက်တဲ့ လူတော်လူကောင်းတစ်ယောက် အပြင်
စင်္ကာပူရောက် ကျွန်တော်တို့ မြန်မာများ လိုလားတဲ့ ပန်းတိုင်ဖြစ်တဲ့
PR (Permanent Residence) အဖြစ်သို့ လျင်စွာ မုချ ဧကန်ရောက်ပါစေဆိုပြီး……..”