နိစ္စဒူဝ

လုပ်ပြောနှစ်ထွေ ညီလှစေ....

မလုပ်မပြော လုပ်မှပြော
အပြောချိုလှစေ

အပြောသာချဲ့ အလုပ်မဲ့
ကဲ့ရဲ့မလွတ်စေ။

ကျေးဇူးတော်ရှင် မင်းကွန်းဆရာတော်

မနက် ၆နာရီခွဲပြီဆိုရင် နိုးစက်က တခွီခွီနဲ့ မြည်တော့တာဘဲ။ ထုံးစံအတိုင်း ပြန်ပိတ်ပြီး ခဏလောက် ထပ်ပြီး မှိန်းနေလိုက်တယ်။ ၇ နာရီလောက်ကျတော့မှ အိပ်ယာထပြီး ကွန်ပျူတာစဖွင့်၊ ပြီးတော့ လုပ်နေကြအတိုင်း မေတ္တာပို့တေးသံသာနဲ့ မနက်ခင်းကို ကျက်သရေနဲ့လင်းစေတယ်။

ဘုရားသောက်တော်ရေနဲ့ ပန်းတွေကို ပြန်ပြီးသန့်စင်၊ နောက်တော့ မနက်စာအတွက် ကြက်ဥကြော်၊ ရေနွေးတည်ပြီး စားဖို့အသင့်ဖြစ်အောင်ပြင်ထား၊ ပြီးတော့ ရေချိုးတယ်။ ၇ နာရီ ၄၅ လောက်ရောက်တော့ အားလုံးအဆင်သင့်၊ ဒါနဲ့ မနက်စာ ကမန်းကတန်းစား၊ ၈ နာရီထိုးတာနဲ့ အိမ်ကစထွက်တယ်။ ကားဂိတ်ရောက်တော့ ကားမလာသေးရင်၊ သတင်းစာ အလကားပေးတဲ့ ဒေသန္တရဆေးခန်းထဲဝင်ပြီး ရလိုရငြားဝင်ကြည့်၊ ကျန်သေးရင် ယူလိုက်၊ မကျန်ရင်လဲ မတက်နိုင်။ ပြီးတော့ ကားလာရင် ခရီးဆက်။

ရုံးရောက်တော့ ၈နာရီခွဲ ကွက်တိ။ ပုဗ္ဗကိစ္စဖြစ်တဲ့ .. ရေအိမ်တက်ခြင်း၊ မြန်မာသတင်းလေးဘာလေးကို အင်တာနက်ကကြည့်ခြင်း၊ အာလာပ သာလာပလေးပြောခြင်း စတာတွေကိုလုပ်။ ၉နာရီလောက်ကျမှ
မဟာတာဝန်တွေကို စပါပြီ။ ရောက်လာတဲ့ အမှာစာ၊ ဈေးနှုန်းမေးမြန်းစာ၊ ပြဿနာရှာစာ စတာတွေကိုဖတ်ပြီး စာပြန်စရာရှိတာပြန်၊ ဈေးနှုန်းပေးစရာရှိတာတွေပေးပြီး စာတိုက်ပုံးကို ရှင်းသလိုဘဲ ကျွန်တော့်ရဲ့ အီးမေး စာပုံးကိုလည်းရှင်းလင်းရတယ်။ ပြီးတော့မှ လက်ခံပြီးသား အလုပ်တွေကို ဒီဇိုင်နာတွေနဲ့ ဆွေးနွေး၊ ရှင်းပြ၊ လာသမျှဖုန်းထဲက ကိုယ်သက်ဆိုင်ရာကိစ္စတွေကို လက်ခံပြောကြားတယ်။

ဆရာတော်ကြီးမိန့်တဲ့အတိုင်းဘဲ ကျွန်တော်ကိုယ်တိုင်က မလုပ်ဘဲနဲ့ လေမရှည်ချင်ဘူး၊ တကယ်လုပ်ပြီဆိုမှဘဲ လက်မထောင်ခြင်တဲ့သူဆိုတော့ တခြားသူတွေနဲ့ တခါတလေ ဆက်ဆံရတာ ကိုးလိုကန့်လန့် နိုင်လွန်းတယ်ဗျ.. မတတ်နိုင်ဘူးလေ။ လူအမျိုးမျိုး စိတ်အဖုံဖုံဆိုတော့..... လူကြီးရှေ့ကြရင် တစ်မျိုး ကွယ်ရာ တစ်မျိုး တော်တော်တက်နိုင်တဲ့သူတွေလို့ ဘဲမှတ်ယူပါတယ်။

ဒီလိုနဲ့ထမင်းစားချိန်ရောက်ရင် စား၊ နေ့လည်ကော်ဖီသောက်ချိန်ရောက်ရင်သောက်နဲ့ လောကကြီးရဲ့ စည်းစိမ်ကို တင်းပြည့်ကျပ်ပြည့်ခံစားတယ် ..ဟဲဟဲ.။

စိတ်ထဲတော့တွေးမိပါတယ်။ အင်း...သူများတွေကတော့ ပြောတယ် စင်္ကာပူမှအလုပ်လုပ်တာ တော်တော်ပင်ပန်းတယ်၊ ဘာဖြစ်တယ် ညာဖြစ်တယ်ပေါ့ဗျာ။ ကျွန်တော်ကတော့ အဲဒီလိုမထင်ပါဘူး။ ရန်ကုန်မှာလုပ်တုန်းကဆို တပတ်လုံးအလုပ်လုပ်ရတာ၊ နားရက် ၁ ရက်ရပြန်တော့လည်း အစည်းအဝေး တို့ ဘာတို့ကရှိနေတော့ ဘာမှမထူးဘူး။ မနက် ၇ နာရီလောက်စပြီးအိမ်ကထွက်တာ ည ၉နာရီကျော်မှ အိမ်ပြန် ရောက်တယ်။ ကျွန်တော့်ညီအငယ်ဆုံးဆိုရင် ကျွန်တော့်ကိုတောင်မမှတ်မိဘူး။ တွေ့လိုက်တိုင်း လူစိမ်းတစ်ယောက်လိုဘဲထင်နေတာ သူ တော်တော်ကြီးတဲ့အထိကိုဘဲ။

ကျွန်တော့်အတွက်ကတော့ အခုချိန်အထိ စင်္ကာပူမှာအလုပ်လုပ်ရတာ ရန်ကုန်ထက်စာရင် အပန်းဖြေတဲ့ရက် ပိုတောင်ရသေးတယ်။ စနေ တနင်္ဂနွေနားရက်ဆို အိမ်မှာနားရင်နား၊ မနားချင်ရင် သူငယ်ချင်းတွေနဲ့သွားတယ်။ တစ်နှစ်ကို ရန်ကုန်ကို ၂ ခေါက်ပြန်တယ်။ ဒါ့အပြင် အိမ်နီးနားချင်းနိုင်ငံ တွေကို အားတဲ့အခါ၊ ငွေနဲနဲရွှင်တဲ့အခါ လျောက်လည်တယ်။ ရန်ကုန်မှာဆို နိုင်ငံခြားသွားလည်ဖို့ဆိုတာ မဟာသူဌေးတွေသာ စဉ်းစားနိုင်တာ။

ဒီလိုနဲ့ ညနေပိုင်းအချိန်တွေကိုလည်းကုန်လွန်ရော အိမ်ပြန်ဖို့ သုတ်ခြေတင်တော့တာဘဲ။ ပြန်ရောက်တာနဲ့ ထမင်း ဟင်းမချက်ရသေးဘူးဆိုရင် ရှိတာတွေကိုထုတ်ချက်၊ အချိန်ရရင် အိမ်ဘေးနားက တူးမြောင်းတလျောက် အပြေးလေ့ကျင်တယ်။ လေ့ကျင်ခန်းမလုပ်ဖြစ်တာ ကြာပြီဆိုတော့ ခန္ခာကိုယ်က တဖြည်းဖြည်းနဲ့ ၀ိတ်ပေါကြီးဖြစ်လာပြီ။ တစ်ခါတစ်လေတော့ ရေကူးဖြစ်တယ်။ လေ့ကျင့်ခန်းလုပ်ပြီးပြန်လာတာနဲ့ ရေချိုး၊ အတူနေသူငယ်ချင်းတွေနဲ့ ညစာစားကြ၊ ပြီးတော့ ကျွန်တော့် အီးမေးတွေစစ်၊ အင်တာနက်ကြည့်နဲ့ ညကို အချိန်ကုန်လွန်စေပြန်တယ်။ ည ၁၂နာရီ ထိုးပြီဆိုတော့မှဘဲ
စိတ်ဒုန်းဒုန်းချ၊ ဘုရားကို ပုစိန်ပေါက် ပေါက်ရှိခိုးပြီး အနားယူတော့တာပါဘဲဗျာ...........

စိတ်ထဲကတော့... အားလုံး အားလုံး ကိုယ်စိတ်နှစ်ဖြာ ကျမ်းမာ ချမ်းသာကြပါစေလို့ ............